வாழ்வே சங்கீதம்-எம்.எஸ். !


மதுரை சண்முகவடிவு சுப்புலட்சுமி அவர்களின் தாயார் வீணை வாசிப்பில் சிறந்த தேர்ச்சி கொண்டவர். சுப்புலட்சுமியின் பாட்டி அக்கம்மா வயலின் வாசிப்பில் புகழ் பெற்றவர். அங்கே இருந்தே அவரின் இசைப்பயிற்சி துவங்கியது. பெண்களுக்கு மேடைகள் இல்லை என்கிற அன்றைய வழக்கம் அவரின் இசை முன் தூள் தூளானது

ஐந்தாவதோடு பள்ளிப்படிப்பை நிறுத்திக்கொள்ள வேண்டிய சூழல் ஆசிரியர் அடித்ததால் ஏற்பட்ட கக்குவான் இருமலால் உண்டானது. இன்றைக்கு எல்லாம் ஓரளவிற்கு உயரம் போனால் கற்பது நின்றுபோகிறதே
வாழ்நாள் முழுக்க அனுதினமும் கற்றுக்கொண்டே இருந்தவர் அவர்.
.

காந்தியடிகள் தன்னுடைய பிரார்த்தனை கூட்டங்களில் எம்.எஸ். அவர்களையே மீரா பஜன் பாடச்சொல்வார். ஹரி தும் ஹரோ பாடலை மற்றவர் பாடி கேட்பதைவிட எம்.எஸ். அவர்கள் பேசிக்கேட்டாலே போதும் என்றார்.

அவரின் கணவர் சதாசிவம் திருமணமான ஆரம்பகாலத்தில் ”நீ பாடணும்… தர்மத்துக்காகப் பாடணும்” என்றார். அதற்கேற்ப எவ்வளவோ ஈட்டினாலும் அறக்காரியங்களுக்கு அளவில்லாமல் அள்ளிக்கொடுத்தார் அவர். யாரையும் திட்டி பழக்கப்படாதவர். ஐ.நா.சபையில் பாடினார் ,இந்திய சுதந்திரத்தின் பொழுது பாடினார்,உலகம் முழுக்கப் பாடினார். அப்பொழுதும் தன்னை ஒரு எளிய பெண்ணாக
தான் பாவித்து வாழ்ந்தார் .

ஐ.நா. சபையில் காஞ்சி பெரியவர் இயற்றிய மைத்ரீம் பஜத மற்றும் ராஜாஜி இயற்றிய ஆங்கிலப்பாடல் ஆகியவற்றை அவர் பாடினார். நியூயார்க் டைம்ஸ் இதழ் ,”இந்த இசை நிகழ்வு நினைவில் எப்பொழுதும் நிறைந்திருக்கும் !” என்று புகழாரம் சூட்டியது.

தமிழ், கன்னடம், மலையாளம், தெலுங்கு, வங்காள மொழி, இந்தி, சமஸ்கிருதம், குஜராத்தி ஆகிய பல்வேறு மொழிகளில் பாடிய அவர் உச்சரிப்பில் தனித்த கவனம் செலுத்துவார். ஒவ்வொரு மொழியிலும் கச்சிதமாக பாடவேண்டும் என்கிற கொள்கை கொண்டவர்.

மீரா படத்தின் முதல் ரீலில் சரோஜினி நாயுடுவே தோன்றி ,”இசைக்குயில் பட்டம் எம்.எஸ். அவர்களுக்கு உரியது. இந்த தலைமுறையில் இப்படியொரு மகத்தான கலைஞர் உருவாகி இருக்கிறார் என்று இந்தியாவே பெருமைப்படும் !” என்று சரியாகச்சொன்னார்.

மத்திய பிரேதசத்தில் நடந்த சம்மான் விருது வழங்கும் நிகழ்வுக்கு எம்.எஸ். மற்றும் சதாசிவம் ஆகிய இருவரும் போயிருந்தார்கள். ஒய்வு எடுத்துக்கொண்டு
இருக்கும் பொழுது யாரோ ஹிந்தியில் அழைப்பது தெரிந்து வெளியே வந்து பார்த்தார் சதாசிவம். ஒரு பழ வியாபாரி நின்று கொண்டிருந்தார். “அம்மா
பாடுறதை கேட்கணும். மீரா படத்தில் இருந்து ஒரே ஒரு பாட்டு பாடினால் போதும். !” என்று அவர் கேட்டுக்கொள்ள சதாசிவம் கண்ணசைக்க எம்.எஸ் பாடினார்.

அந்த பழ வியாபாரி கேட்டுகொண்டே இருந்தார். பாடி முடித்ததும் இரண்டு பழங்கள் அம்மாவின் கைக்கு மாறியிருந்தன. சதாசிவம்
சொன்னார்,”எல்லாவற்றையும் விட பெரிய சன்மானம் இதுதான் ” என்று. அந்த பழங்களை கண்களில் ஒற்றி எம்.எஸ்.அதை உறுதிப்படுத்தினார்

ரஷ்யாவில் எம்.எஸ் பாடப்போயிருந்த பொழுது விழா முடிந்ததும் ஒரு ரஷ்ய பெண்மணி கண்களில் நீர் கோர்க்க எம்.எஸ். அவர்களிடம் வந்து தன் இதயத்தின்
மீது கைவைத்து நெகிழ்ந்ததை குறிப்பால் உணர்த்திவிட்டு மலர்கொத்து ஒன்றை எம்.எஸ். அவர்களின் கையில் திணித்தார்

”நான் யார் போயும் போயும் இந்த இந்திய தேசத்தின் பிரதமர்-ஆனால் எம்.எஸ்.அவர்களோ இசை அரசி அல்லவா?”என நேரு சொல்கிற
அளவுக்கு அவரின் இசை இந்தியாவை கட்டிபோட்டது. பாரத ரத்னா பெற்ற முதல இசைக்கலைஞர் அவர்.
‘குறையொன்றும் இல்லை மறைமூர்த்தி கண்ணா’ என்று பாடி தன்னுடைய கச்சேரிகளை முடிக்கும் வழக்கம் கொண்ட அவரின் இசை காலமெல்லாம் ஒலிக்கும்.

Advertisements

நாகேஸ்வர ராவ் எனும் நடிப்பு சிம்மம் !


அகிநேனி நாகேஸ்வர் ராவ் என்.டி.ஆர். அவர்களுடன் இணைந்து தெலுங்குத் திரையுலகை கலக்கிய சூப்பர் ஸ்டார்

விவசாயக்குடும்பத்தில் இருந்து சினிமா வாய்ப்புகள் தேடி வந்தவர் நாடகங்களில் பெண் வேடங்களில் நடித்து வந்தார். கண்டசாலா பலராமையா தன்னுடைய சீதா ராம ஜனனம் படத்தில் நடிக்க நாயகனைத்தேடியவாறு இருந்தவர் இவரை விஜயவாடா ரயில்வே நிலையத்தில் கண்டு நாயகனாக ஆக்கினார்
‘சோக நாயகன்’ என்று சொல்கிற அளவுக்கு மஜ்னு,சலீம் முதலிய வேடங்களில் நடித்து புகழ்பெற்றவர். அவரின் தேவதாசு படத்தின் நடிப்பு வெகு புகழ்பெற்றது. ஹிந்தியில் பிமல் ராய் அப்படத்தை ரீமேக் செய்த பொழுது நாயகன் திலீப் குமார் இப்படிச்சொன்னார் ,”ஒரே ஒரு தேவதாஸ் அது நாகேஸ்வர ராவ் !”
கடவுள் நம்பிக்கை இல்லாதவராக இருந்தாலும் புராண வேடங்களில் நடிக்க எப்பொழுதும் மறுப்பு சொன்னதில்லை. நடிகை ஜெயசுதாவுக்கு அன்போடு இயேசுவின் சிலையை பரிசளித்தார். அந்த அளவுக்கு பிறர் உணர்வுகளை மதிப்பவர்.
நான்காம் வகுப்பு வரை மட்டுமே கல்வி கிடைத்திருந்தாலும் கற்பதற்கு முடிவே இல்லை என்று எண்ணியவர். தி ஹிந்து செய்தித்தாளை படித்தே ஆங்கில அறிவை வளர்த்துக்கொண்டவர். இன்னொரு நடிகர் நடிக்கிற பொழுது செட்டை விட்டு நகராமல் அவரிடமிருந்து ஏதேனும் கற்றுக்கொள்ள முடியுமா என்று பார்ப்பார்.
தெலுங்குப் படங்கள் எல்லாம் தமிழகத்திலேயே உருவாகிக்கொண்டிருந்த காலத்தில் அதை மாற்ற இருபத்தி எட்டு ஏக்கரில் அன்னபூர்ணா ஸ்டுடியோவை ஹைதரபாத்தில் உருவாக்கினார்.
தெலுங்குத் திரைப்படங்களில் நடனக்காட்சிகள் கொண்டு வந்தது,முதன் முதலில் இரட்டை வேடத்தில் நடித்தது,ஒன்பது வேடங்களில் தோன்றியது எல்லாமும் அவரே !
அவர் நடித்து வெளிவந்த பிரேமபிஷேகம் திரைப்படம் 533 நாட்கள் ஓடியது இன்றுவரை டோலிவுட்டில் முறியடிக்கப்படாத சாதனை.
மகாகவி காளிதாஸ்,ஓடிசாவின் ஜெயதேவா,கர்நாடகத்தின் அமரசில்பி ஜக்கன்னா,தமிழகத்தின் விப்ரநாராயணா முதலிய பக்தியாளர்கள் வேடங்களில் நடிப்பதை பெருமையாக கருதினார். “நம்முடைய கலாசாரம்,பண்பாட்டில் எவ்வளவு செறிவு இருக்கிறது. ஏன் மேற்கை நாம் பிரதியெடுக்க வேண்டும். சீனர்கள் மற்றும் கொரியர்கள் போல அவர்கள் மண்ணைப் பிரதிபலிக்கும் படங்களை எடுக்க வேண்டும்.” என்பது அவரின் எண்ணம் 
அகிநேனி நாகேஸ்வர ராவ்
 
கலைமாமணி,அறிஞர் அண்ணா விருது,இரு முறை தேசிய விருது,தாதாசாகிப் பால்கே விருது ஆகியன பெற்றிருக்கும் அவர் தன்னுடைய பெயராலேயே ஒரு விருதை நிறுவினார். அதை பாலச்சந்தர்,ஹேமமாலினி,ஷ்யாம் பெனகல் முதலியோர் பெற்றிருக்கிறார்கள். 
கேன்சரால் பாதிக்கப்பட்டு படுக்கையில் இருந்த பொழுதும் அவரின் மகன் நாகர்ஜுனா மற்றும் பேரன் நாக சைதன்யாவுடன் இணைந்து நடித்த மனம் படத்தின் டப்பிங் வேலைகளை முடித்துக்கொடுத்தார். 

சுனிதா வில்லியம்ஸ் என்று விண்வெளி தேவதை !


அப்பா தீபக் பாந்த்யா நரம்பியல் வல்லுநர். அம்மா போன்னி பாந்த்யா, ஸ்லோவேனிய அமெரிக்கர். கணவர் மைக்கேல் ஜே.வில்லியம்ஸ் போலீஸ் அதிகாரி. வீட்டில் எக்கச்சக்க மூளை வரைபடங்களால் ஆர்வம் ஏற்பட்டு சுனிதா பாண்டியா கிருஷ்ணா ஆசைப்பட்டதோ கால்நடை மருத்துவராக !
\அண்ணன் கடல்சார் பல்கலையில் படித்துக்கொண்டிருந்தார். அவரின் அறிவுரையின் பெயரில் அங்கே படித்து பட்டம் பெற்றார்.
கப்பற்படையில் இணைந்து பணியாற்றுகிற பொழுது செங்கடல்,மத்திய தரைக்கடல் பகுதியில் பைலட்ட்டாக பணியாற்றி ஒரு கப்பலை விட்டு இன்னொரு கப்பலுக்கு குண்டுகள்,உணவுப்பொருட்கள் என்று சகலமும் விமானத்தின் மூலம் மாற்றுகிற சாகசத்தில் ஈடுபட்டார்.
விண்வெளியில் மாரத்தான் ஓடிய முதல் நபர் அவரே. அப்பொழுது அவருக்கு உண்ண ஆரஞ்சுப்பழங்கள் கொடுத்து அவரின் சகாக்கள் உற்சாகப்படுத்தினார்கள். அங்கே இருந்தபடியே சுட்டிகளுக்கு வானொலியில் ஹாய் சொல்லி பேசவும் செய்தார்
 விண்வெளியில் ஓடிக்கொண்டே இருக்கும் பொழுதே தன்னுடைய தலைமுடியை கத்தரித்து பல்வேறு நோய்களால் இழந்துவிடும் சிறுவர்களுக்கு மற்றவர்களிடம் இருந்து கேசத்தை பெற்றுத்தரும் ‘லாக்ஸ் ஆப் லவ் அமைப்புக்கு’ வழங்கி விழிப்புணர்வு உண்டு செய்தார்.
விண்வெளிப்பயணத்துக்கு கிளம்பிய பொழுது கொண்டு சென்றது ஒரு பகவத் கீதை புத்தகம்,விநாயகர் சிலை மற்றும் சமோசாக்கள் ! பனிச்சறுக்கு,நீச்சல்,பைக் ஓட்டுதல்,ட்ரையாத்லான் ஆகியவை அவரின் குறிப்பிடத்தகுந்த பொழுதுபோக்குகள்.
நாசாவுக்கு விண்ணப்பம் செய்து ஒன்றரை வருடங்கழித்து அழைப்பு வந்தது. அதற்குப் பின்னர் சர்வதேச விண்வெளி மையத்தில் வேலைப் பார்த்தார். அப்பொழுது ரஷ்யர்களுடன் இணைந்து பணியாற்றி ரஷ்யன் மொழி பேசியது வேடிக்கையான அனுபவமாக அவருக்கு அமைந்தது.
மூவாயிரம் மணிநேரத்துக்கு மேல் விண்வெளியில் இருந்தவர் என்கிற சாதனைக்குரிய சுனிதா கடல் மற்றும் அதன் அமைதியை  ரொம்பவே மிஸ் செய்வதாக சொல்கிறார்.
 இந்தியப்பெண் ஒருவரை தத்தெடுத்துக்கொள்ள வேண்டும் என்பது அவரின் நெடுநாள் ஆசை

அஸ்வின் எனும் கிரிக்கெட் சுழல் வீரர் !


அப்பா தெற்கு ரயில்வேயில் வேலை பார்த்தவர். இளம் வயதில் க்ளப் அளவில் கிரிக்கெட் ஆடிய அவர் குடும்பச்சூழலால் தனக்குள் கனவுகளைப் புதைத்து கொண்ட அப்பா அஸ்வினுக்கும் கிரிக்கெட்டில் ஆர்வம் என்று புரிந்ததும் ஒரு மாதச்சம்பளத்தில் கிரிக்கெட் மட்டை வாங்கித்தருகிற அளவுக்கு ஊக்குவித்தார்.
கிரிக்கெட்டில் அஸ்வின் மின்னினாலும் வீட்டில் படிப்புக்கும் முக்கியத்துவம் தந்தார்கள். கிரிக்கெட் மட்டுமே வாழ்க்கையாகாது என்கிற பயம் அவர்களுக்கு இருந்தது. எஸ்.எஸ்.என் கல்லூரியில் தகவல் தொழில்நுட்ப பிரிவில் படித்து பட்டம் பெறுகிற அளவுக்கு அந்த கண்டிப்பு உதவியது
அஸ்வினின் டி.ஷர்ட் நம்பர் இந்திய அணி மற்றும் சென்னை சூப்பர் கிங்க்ஸ் அணியில் 99. அவரின் ட்வீட்டர் அக்கவுண்டின் பெயர் ashwinravi99
ஆரம்ப காலங்களில் ஓபனிங் பேட்ஸ்மானாக இருந்த அஸ்வினுக்கு இடுப்பில் ஒரு அறுவை சிகிச்சை செய்ய வேண்டி வந்தது. இரண்டு மாத காலம் நடக்கவே முடியாமல் அவதிப்பட்ட அவர் எட்டு மாதங்கள் கழித்து   பள்ளி அணிக்கு திரும்பினால் அவரின் இடம் பறிபோய் இருந்தது. அதற்குப்பிறகு தான் ஸ்பின்னராக அஸ்வின் தன்னை மாற்றிக்கொண்டார்.
டென்னிஸ் பந்தைக்கொண்டு கிரிக்கெட் ஆட ஆரம்பித்த பயணம் தான் தேசிய அணி வரை கொண்டு சேர்த்தது. இப்பொழுதும் சத்தமே இல்லாமல் சென்னையில் ஐ.பி.எல் போட்டிகள் நடக்கிற பொழுது நேரம் கிடைத்தால் தலையில் கைக்குட்டையை கட்டிக்கொண்டு கல்லி கிரிக்கெட் ஆடப்போய் விடுவார். அங்கே இடது கையால் சுழற்பந்து வீச்சு வீசுவது மாதிரியான வித்தியாசமான முயற்சிகள் செய்வார்
அஸ்வினின் ஆயுதம் அவரின் பல்வேறு ரகமான பந்துகள். விக்கெட் எடுக்க உதவும் கேரம் பந்தின் பிரயோகத்தை சென்னைக்கு ஆட வந்த அஜந்தா மென்டிஸ் பயன்படுத்தியதைக்கண்டு தெரிந்து கொண்டார். பின்னர் தனக்கு ஏற்றவாறு மாற்றி கலக்கி எடுக்கிறார். அது ஒரு தற்காப்பு பந்து தான் என்று வாக்குமூலம் தருகிறார்,
இந்திய கிரிக்கெட் அணியில் சில காலம் சும்மாவே உட்கார வைக்கப்பட்டார். முதல் போட்டிக்கு தேர்வானதும் சச்சின் கையால் அவருக்கு கேப் தரப்பட்டது. அணிக்கான நீல ஜெர்சி கைக்கு வந்ததும் அணிந்து கொண்டு செய்த முதல் வேலை இரண்டு போட்டோக்களை சந்தோஷமாக எடுத்துக்கொண்டது தான்.
ரவிச்சந்திரன் அஸ்வின் - கோப்புப் படம் ; ஏ.எஃப்.பி
விதவிதமாக ஜீன்ஸ் அணிவது,வெவ்வேறு ஹேர்ஸ்டைல்கள் வைத்துக்கொள்வது,புதுப்புது டயல்கள் கொண்ட டென்னிஸ் ஆடுவது,ஜாலியாக ஒரு லாங் டிரைவ் போவது எல்லாமும் பிடிக்கும். 
 
ஜாகுவார் மற்றும் ஆடி கார்களின் தீவிர ரசிகர்.  சத்யமில் “பாப் கார்ன் சாப்பிட்டபடி படம் பார்ப்பது சொர்க்கம் பாஸ்” என்பார் !
முதன் முதலில் அறிமுகமான டெஸ்ட் தொடரில் இரண்டு முறை ஆட்ட நாயகன் விருது பெற்றது,அதிவேக ஐம்பது டெஸ்ட் விக்கெட்கள்,நம்பர் ஒன் ஆல்ரவுண்டர் என்று பல்வேறு சாதனைகள் கைவசம் இருந்தாலும் ,”பத்து விக்கெட்டும் எனக்கே வேண்டும் !என்று தான் பந்தைக்கையில் எடுப்பேன் ” என்கிறார்

நடிப்புலகின் ராணி ஷபனா ஆஸ்மி


புதிய அலை ஒன்று இந்திய சினிமாவை எழுபதுகளில் தாக்கியது. அதில் கிடைத்த ஒரு முத்து தான் ஷபனா ஆஸ்மி :

கம்யூனிஸ்ட்கள் வீட்டில் இரவெல்லாம் கவிஞரான அப்பாவோடு கூட்டம் மற்றும் உரையாடல் நடத்திவிட்டு அங்கேயே உறங்குவதைப் பார்த்து வளர்ந்த பெண்.

இவருக்கு பின்பு பிறந்த தம்பியின் மீது வீட்டில் அதிக செல்லம் என்று இவருக்கு எக்கச்சக்க மன உளைச்சல். ஏழு வயதில் நீலத்துத்தம் சாப்பிட்டு தற்கொலை செய்துகொள்ள முயன்றார். காலாவதி ஆகியிருந்தது விஷம். ரயிலின் முன் குதிக்கப்போனவரை பிடித்து இழுத்துக்கொண்டு வந்தார்கள் 

உளவியல் துறையில் பட்ட பெற்ற பின் புனே பிலிம் இன்ஸ்டிடியூட்டில் சேர்ந்து கற்றார். வெளியே வந்ததும் பட வாய்ப்புகள் குவிந்தன. இன்னொரு ஆண் மீது ரகசியக்காதல் கொள்ளும் வேடத்தில் ஷ்யாம் பெனகலின் அங்கூர் படத்தில் நடித்ததற்கு முதல் படத்திலேயே தேசிய விருது கரங்களில் வந்து விழுந்தது. 

மரத்தை சுற்றி டூயட் பாடும் படங்களில் நடிக்க விருப்பமில்லாமல் வித்தியாசமான வேடங்களில் நடித்தார். ஒரு பாலின உறவு கொண்ட பெண்ணாக,வேசிகளைத் தரும் பெண்ணாக சர்ச்சைக்குரிய வேடங்களில் நடித்தாலும் நடிப்பால் கலக்கி எடுப்பார். 

அர்த்,காந்தார்,பார் என்று அடுத்தடுத்து மூன்று வருடங்கள் சிறந்த நடிகைக்கான விருதை அள்ளி பிரமிக்க வைத்தார். 

மொத்தமாக ஐந்து தேசிய விருதுகள் 

ஏற்கனவே திருமணமாகி இருந்த கவிஞர் ஜாவீத் அக்தர் தந்தையை அடிக்கடி காண வருவார். அப்பாவுடன் அரசியல்,கவிதை என்று பேசும் அவருடன் பேச ஆரம்பித்ததும் காதல் பூத்தது. பிரிந்து விடலாம் என்றெல்லாம் பேசிப்பேசி பிறகு திருமணம் செய்து கொண்டார்கள்.

ஹாய்,பாய் சொல்லிக்கொள்ள கூட நேரமில்லாமல் இருவரும் ஓடிக்கொண்டே இருந்த காலங்கள் உண்டு. உடலில் இருந்த சில சிக்கல்களால் பிள்ளைப்பேறு இல்லை என்று ஆன பொழுது ஷபானா,”வாழ்க்கையில் எல்லாம் கிடைத்துவிடுவதில்லை !” என்று தேற்றிக்கொண்டு முதல் தாரத்தின் பிள்ளைகளோடு நேரம் செலவழித்து அன்பு காட்டினார்.

மதவாத எதிர்ப்பு நாடகங்கள்,செயல்பாடுகளில் தீவிரமாக பங்குபெற்றவர். செப்டம்பர் பதினொன்று தாக்குதலுக்கு பின்னர் ஆப்கனில் போரிட இந்திய இஸ்லாமியர்களுக்கு ஒரு மதத்தலைவர் அழைப்பு விடுக்க அதை கடுமையாக கண்டித்தார். “ஒரு இஸ்லாமியராக இருந்து கொண்டு வீடு பெறுவது எனக்கு கடினமான வேலையாக இருக்கிறது. உண்மையான இஸ்லாம் எது என்பதை மதத்தலைவர்கள் தெளிவுபடுத்த வேண்டும் !” என்றார்

கோப்புப் படம்: சுஷில் குமார் வர்மா

இவரின் பர்ஸ்,மெயில் எதையும் ஜாவீத் அக்தர் பார்க்க அனுமதியில்லை. ஆனால்,சகலத்தையும் சோதிக்கும்  உரிமை இவருக்கு உண்டு.

“படங்களை தடை செய்வதில் உடன்பாடில்லை. நிர்வாணம் மற்றும் வன்முறையை விட ஆபத்தானது பெண்களை இரண்டாம் தர மனிதர்களாக காட்டுவது. அது ஆண்கள் ஆதிக்கம் செலுத்தும் சமூகத்தில் இன்னமும் தவறான எண்ணங்களை விதைக்கும். இப்படிப்பட்ட சித்தரிப்புகள் தவறான செய்திகளை கொண்டு சேர்க்கும். உழைக்கும் பெண்களின் வாழ்க்கையை திரைப்படங்கள் பதிவு செய்வதே இல்லை ” என்பது அவரின் பார்வை

ஹெச்.ஐ.வி.யால் பாதிக்கப்பட்டவர்கள் நலன் காக்க பிரச்சாரம் ,லத்தூரில் நில நடுக்கத்தால் பாதிக்கப்பட்டவர்களுக்கு உதவிகள்,காஷ்மிரி பண்டிட்களுக்கு உதவும் முயற்சிகள்,ஐம்பதாயிரம் சேரிவாழ் மக்களுக்கு வீடுகளை அரசாங்கத்தோடு இணைந்து கட்டித்தந்தது என்று நீள்கிறது இவரின் சேவைப்பட்டியல்

கிறிஸ் கெயில் எனும் கிரிக்கெட் புயல்


ஜமைக்கா சொந்த நாடு. லூக்காஸ் கிரிக்கெட் க்ளப்பில் இளமைக்காலத்தில் ஆடியவர். அந்த க்ளப்பில் இடம் கிடைக்காமல் போயிருந்தால்  தெருக்களில்தான் தன்னுடைய வாழ்க்கையை கழித்திருக்க வேண்டும் என்றார்.டெஸ்ட்,ஒருநாள்,ட்வென்டி ட்வென்டி ஆகிய மூன்று வகையான சர்வதேசப்போட்டிகளிலும் சதம் அடித்த முதல் வீரர் அவரே.
 
சீரற்ற இதயத்துடிப்பு ஒரு காலத்தில் பெரிய தொல்லை கொடுத்துக்கொண்டு இருந்தது. ஒரு போட்டியில் ஆட்டத்தை விட்டு அதனால் வெளியேற வேண்டிக்கூட வந்தது.  ட்ரிப்பிள் செஞ்சுரியை இரண்டு முறை டெஸ்ட் போட்டிகளில் அடித்த நான்காவது வீரர். 150 ப்ளஸ் ஸ்கோர்களை ஒரு நாள் போட்டிகளில் மூன்று முறை அல்லது அதற்கு மேலே அடித்திருக்கும் ஆறு வீரர்களில் அவரும் ஒருவர். சில ஆண்டுகளுக்கு முன்பு பெங்களூருவில் இவர் சிக்ஸர் அடித்த பந்து, ஒரு பெண் குழந்தையின் மூக்கில் பட்டு காயமாகிவிட்டது. பதறிப்போன கெயில், மருத்துவமனைக்குச் சென்று குழந்தைக்கு ஆறுதல் சொல்லி, அன்றைய தினம் வென்ற ‘ஆட்ட நாயகன்’ பரிசை அவளுக்கே கொடுத்துவிட்டார்.
 அடித்து மட்டுமே ஆடுகிறவர் அவர் என்று எண்ணினால் ஸாரி. ஆஸ்திரேலியா அணியுடனான அடிலெயிட்  டெஸ்ட் போட்டியில் ஏழரை மணிநேரம் தனி ஒருவராக பேட் செய்து டிரா செய்தார். பேட்டிங் செய்யும் பொழுது இடக்கை,பவுலிங் செய்யும் பொழுது வலக்கையை பயன்படுத்துவார்.
 
டெஸ்ட் போட்டியின் முதல் பந்திலேயே சிக்சர் அடித்து ஆரம்பித்து வைத்த ஒரே வீரர் கெயில் தான். 
ஒரே ஓவரில் கொச்சி அணிக்கெதிரான போட்டியில் ஒரு நோபால் வேஈப்பட்ட ஓவரில் அவர் அடித்த ரன்கள் முப்பத்தி ஆறு (நான்கு சிக்சர்,மூன்று பவுண்டரி )
. இளம் வயதில் ஒல்லியாக இருந்ததால் பந்துகளை பவுண்டரிகள் நோக்கி விரட்ட எடை மிகுந்த பேட்டை பயன்படுத்தத் தொடங்கியதில் இருந்து பந்தை காட்டடி அடிப்பது துவங்கியது
gayleforce,gaylestorm,masterstorm முதலியன அவரின் பட்டப்பெயர்கள். ஆடுகளத்தில் பெரும்பாலும் கூலாக நடனமெல்லாம் ஆடும் அவரையும் சண்டை போட வைத்த பெருமை ஆஸ்திரேலியா அணியின் மைக்கேல் கிளார்க்கு உண்டு.

மைக்கேல் பாரடே எனும் அறிவியல் மேதை


மைக்கேல் பாரடே வறுமையான சூழலில் கொல்லரின் மகனாக பிறந்து வளர்ந்தார். ஒரே ஒரு பாக்கெட் பிரெட்டை ஒரு வாரத்துக்கு உண்டு வாழ்கிற அளவுக்கு வறுமை வீட்டை வாட்டியது.
புத்தக பைண்டிங் செய்யும் ஜார்ஜ் ரிபோவிடம் வேலைக்கு சேர்ந்தார். புத்தகங்கள் பைண்டிங் செய்து பசியைப் போக்கிக்கொண்டார்.
பல்வேறு அறிவியல் அறிஞர்களின் நூல்களை வாசித்தார்.
M Faraday Th Phillips oil 1842.jpg
ஹம்ப்ரே டேவியின் எழுத்துக்கள் கவர்ந்தது. அவரின் பேச்சைக்கேட்டார். பின்னர் அதை  தொகுத்து அவருக்கே அனுப்பி அசத்தினார். டேவியின் சீடராக இவர் சேர்ந்து பின்னர் அவர் வகித்த வேதியியல் பேராசிரியர் பொறுப்பை ஏற்றுகொண்டார். “என்னுடைய மிகச்சிறந்த கண்டுபிடிப்பு பாரடே தான்” என்று சொன்னார் டேவி
காந்தவியல் மற்றும் மின்சாரவியல் இரண்டுக்கும் இடையே உள்ள தொடர்பை ஆய்வுகள் மூலம் நிரூபித்த மேதை. உலகின் முதல் மின்சார டைனமோ அவராலேயே உருவாக்கப்பட்டது.
மின் மோட்டார்கள் என்பதை நிஜமாக்கிய  மின்தூண்டல் என்பதை உண்டாக்கி சாதித்ததும் அவரே. உலோகங்களை பிரித்தெடுக்கும் மின்பகுப்பு முறையையும் அவர் செம்மைப்படுத்தினார்..
கம்பிச்சுருளுக்குள் காந்தத்தை நகர்த்துவதன் மூலம் மின்சாரம் உற்பத்தி செய்ய முடியும் என்று கண்டறிந்தார் . இதன் அடிப்படையில் மின்சார ஜெனரேட்டர் மற்றும் மின்மாற்றி எனப்படும் transformer ஆகியவற்றையும் உருவாக்கினார்
நல்ல எழுத்தாளரும் கூட. அவரின் மெழுகுவர்த்தியின் வேதியியல் வரலாறு நூல் அறிவியலை எப்படி எளிய மனிதனுக்கும் புரிகிற வகையில் சொல்ல வேண்டும் என்பதற்கு சிறந்த எடுத்துக்காட்டு,
அவரின் பாரடே விளைவு இன்றைக்கு மூலக்கூறுகளின் வடிவத்தை விளக்க பயன்படுகிறது. வாயுக்களை முதன்முதலில் திரவமாகி மாற்றி சாதித்தவரும் பாரடே தான் !
உலகிலேயே அதிகபட்ச பரிசோதனைகள் செய்து பார்த்த அறிவியல் அறிஞர் என்று போற்றப்படுகிறார். எட்டாண்டுகள் ஓயாமல் ஆய்வு செய்து ஒரு ஆறு வருடங்கள் படுத்த படுக்கையாக இருக்கிற அளவுக்கு அறிவியல் மீது ஆர்வம் கொண்டவராக இருந்தார்.