தாவரவியல் ராணி ஜானகி அம்மாள் !


ஜானகி அம்மாள் உலக அறிவியலில் தனித்த இடம் பெற்றவர். கேரளாவில் உள்ள தெள்ளிச்சேரி நகரில் பதினொரு பிள்ளைகள் கொண்ட குடும்பத்தில் பிறந்தார். இளங்கலை மற்றும் முதுகலை பட்டத்தை முறையே சென்னையின் WCC கல்லூரி மற்றும் மாநிலக்கல்லூரியில் பெற்றார். பின்னர் அமெரிக்காவின் மிச்சிகன் பல்கலையில் எம்.எஸ். மற்றும் முனைவர் பட்டத்தைப் பெற்றார். இந்தியாவிலேயே அறிவியல் துறையில் முனைவர் பட்டம் பெற்ற முதல் பெண் என்கிற பெருமையைப் பெற்றார். இந்தியா திரும்பி வந்து திருவனந்தபுரம் பல்கலையில் பேராசிரியராகப் பணியாற்றிய பின்னர்க் கரும்பு உற்பத்தி மையத்தில் கோவையில் பணிக்குச் சேர்ந்தார். அங்கே C A பார்பர் மற்றும் T S வெங்கட்ராமன் ஆகிய அறிவியல் அறிஞர்கள் இந்திய சூழலுக்கு ஏற்ற பல்வேறு கரும்பு கலப்பினங்களை உருவாக்கி பஞ்சாப் மற்றும் தமிழகத்தில் கரும்பு உற்பத்தியை பலமடங்கு பெருக்கினார்கள். வெவ்வேறு இரு மடங்கு எண்ணிக்கையில் க்ரோமோசோம் எண்ணிக்கை கரும்பின் வெவ்வேறு வகைகளில் காணப்படுவதையும் அவற்றைக் கொண்டு நமது தேவைக்கேற்ற கரும்பு வகைகளை உருவாக்க முடியும் என்றும் தன் ஆய்வுகள் மூலம் அவர் நிரூபித்தார்
SG6332 என்கிற கரும்பு வகையை அவர் தன்னுடைய கலப்பு சோதனைகளின் மூலம் உருவாக்கினார். அது மிகவும் சுவைமிகுந்தாகவும் இந்திய மண்ணில் சிறப்பாக வளரும் தன்மை கொண்டதாகவும் இருந்தது.

உலகப்போர் சமயத்தில் இங்கிலாந்தில் பத்து ஆண்டுகள் ஜான் இன்ஸ் மையம் மற்றும் ராயல் தோட்டக்கலை குழுமத்தில் பணியாற்றினார். அங்கே இருக்கும் பொழுது COLCHICINE ஐ நீரில் கலந்து முளைக்கும் விதைகளில் தெளிக்கிற பொழுது குரோமோசோம் எண்ணிக்கை இரு மடங்ககை பெரிய வடிவம் கொண்ட இலைகளும்,வெவ்வேறு வகையான தடித்த இதழ்கள் கொண்ட மலர்களும் உருவாவதைக் கண்டார். அப்படி அவர் உருவாக்கிய மக்னோலியா மலர்களுக்கு மக்னோலியா கோபுஸ் ஜானகி அம்மாள் என்று பெயரிட்டார்கள்.

மிச்சிகன் பல்கலைக்கழகம் உலகம் முழுக்க உள்ள மலர்களின் பெயர்களைத் தொகுக்க முடிவு செய்த பொழுது கபிலரின் சங்கப்பாடலில் வரும் நூறு மலர்களை அப்பட்டியலில் இணைக்க அவர் பரிந்துரைத்தார். மனிதனால் பயிரடப்படும் செடிகளின் க்ரோமோசோம் அட்லஸ் என்கிற கடினமான உழைப்பில் எழுந்த புத்தகத்தை C D டார்லிங்க்டன் என்கிற அறிஞரோடு இணைந்து அவரே உருவாக்கினார். அதில் பல்லாயிரக்கணக்கான இந்திய செடிகள் இடம்பெறவும் அவர் காரணமானார்.

இந்தியாவின் பழங்குடிகள் அதிலும் கேரளா மற்றும் திருநெல்வேலி மலைப்பகுதிகளில் உள்ள பழங்குடிகளின் மருத்துவப் பயன்பாட்டுக்கு பயன்படுத்தும் தாவரங்கள் பற்றி மிகப்பெரும் ஆய்வுகளைச் செய்தார். எப்படி வெவ்வேறு கலப்பினங்களை அவர்கள் உருவாக்கி சாதிக்கிறார்கள் என்று அவர் அறிவியல் ரீதியாக நிரூபித்தார். மேற்கு தொடர்ச்சி மலைகளின் மழைக்காடுகளில் உள்ள தாவரங்களின் வகைப்பாட்டியலை உருவாக்கினார். வடகிழக்கு இமயமலையின் தாவரங்கள் அதிகமான வகைகளில் அமைந்திருப்பதற்குக் காரணம் அதன் குளிர்ந்த மற்றும் ஈரப்பதம் மிகுந்த தட்பவெப்பத்தில் வெவ்வேறு பண்புகள் கொண்ட தாவரங்கள் கலப்பதற்கான வாய்ப்புகள் வறண்ட குளிர்ப்பிரதேசமான வடமேற்கு இமயமலையை விட அதிகம் என்று உறுதிபட நிறுவினார். மேலும் பர்மிய,சீன மற்றும் மலேசிய தாவர இனங்கள் எப்படி இந்தியச்சூழலில் கலந்து பல்வகைத் தாவர வகைகளை உருவாக்கின என்பதை உயிரணுவியல் ரீதியாக விரிவாக விளக்கினார்.

உயிரணுவியல் மற்றும் மரபணுவியல் ஆகியவற்றில் பெரிய அறிவு கொண்டிருந்த அவர் நேரு அவர்களின் வேண்டுகோளுக்கு இணங்க இந்தியா திரும்பி அறிவியல் முன்னேற்றத்தில் பங்குகொண்டார். இந்திய தாவரவியியல் அளவையியல் மையத்தில் பணியாற்றிய அவர் அலகாபாத் மற்றும் ஜம்முவில் ஆய்வு மையங்களை ஏற்படுத்தினார். ஜம்மு புதினா,ஊமத்தை,அருகம்புல்,கருணைக்கிழங்கு,கத்தரி இனங்களின் உயிரணு மற்றும் மரபணுக்கள் பற்றிய முழுமையான ஆய்வுகளை அவர் செய்தார். ஸ்விட்சர்லாந்தில் அவர் தேனீக்களின் கூடுகளைக் கொண்டு சுற்றுப்புற மாசுபாட்டைத் தடுக்கமுடியும் என்று கண்டறிந்து சொன்னதை அடிப்படையாகக் கொண்டு தொழிற்சாலைகளில் மாசைக் கட்டுப்படுத்த தேனீக்களின் கூடுகளைப் பயன்படுத்துகிறார்கள். தாவரங்கள் பல்வேறு வகைகளாகப் பல்கிப்பெருக தேனீக்களின் பங்களிப்பு என்ன என்பது பற்றியும் அவர் மகத்தான ஆய்வுகள் செய்தார்

.

மக்கள்,தாவரங்கள் மற்றும் சுற்றுப்புறச்சூழல் ஆகிவற்றுக்கு இடையே உள்ள உறவு மற்றும் தொடர்புகள் பற்றி முறையான ஆய்வுகள் செய்த அவர் இந்திய வேளாண் அறிஞர்கள் தீவிரமாகத் தேசநலன் மற்றும் வளர்ச்சி என்கிற பெயரில் முன்னெடுத்த பசுமைப் புரட்சி முதலிய பல்வேறு முன்னெடுப்புகளை எதிர்த்தார். பொருளாதார,தேசிய,தத்துவ ரீதியாகத் தாவரங்களை அணுகாமல் சூழலியல்,புவியியல் ஆகியவற்றின் மூலமே அவர் அணுகினார். மனிதனின் மகத்தான கலாசாரப் பரிணாமத்தை தாவரங்களின் உயிரணு மற்றும் மரபணுக்களைக் கொண்டு விளக்கிட முடியும் என்று அவர் உறுதிபடச் செயல்பட்டார்.

ஓய்வுக்குப் பின்னரும் மதுரவாயிலில் தீவிரமான ஆய்வுப்பணிகளில் ஈடுபட்டார். அவர் எண்பத்தி நான்கு வயதில் மரணமடைவதற்கு இரண்டு வாரங்கள் முன்பு வரை ஆய்வுகள் செய்தவண்ணம் இருந்தார். பூமியையே ஆய்வுக்களமாக ஆக்கிக்கொண்ட அவரின் இறுதி ஆய்வுத்தாள் அவரின் மரணத்துக்குப் பின்னர் வெளிவந்தது. இந்திய அரசின் பத்ம ஸ்ரீ விருது பெற்ற அவரின் பெயரால் வகைப்பாட்டியலில் அற்புதமான பங்களிப்பு செய்வோருக்கு விருது வழங்கப்படுகிறது. இறுதிவரை திருமணமே செய்துகொள்ளாமல் மக்களுக்கான,மரங்களுக்கான அறிவியலில் தன்னை அர்ப்பணித்துக்கொண்ட அவர் இறுதிவரை புகழ் வெளிச்சம் தேடாத எளிமையான வாழ்க்கையையே அமைத்துக்கொண்டார். இன்று அவரின் பிறந்தநாள்

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s