பெரியார் எனும் பேராசான் !


பெரிய வணிகரின் மகனாக வாழ்ந்த பெரியார் ஜாதிய அடக்குமுறைகளைத் தன்னுடைய இளம்வயதிலேயே கண்ணுற்றார். காசிக்கு வீட்டில் கோபித்துக்கொண்டு போன போது பசியோடு மடங்களுக்குள் உண்ணச்சென்ற பொழுது ஜாதி பார்த்து உணவிட்ட கொடுமை அவரை ஏகத்துக்கும் பாதித்தது.
காங்கிரஸ் கட்சிக்குள் ராஜாஜியால் கொண்டு வரப்பட்ட பெரியார், பல லட்சம் ரூபாய் மதிப்புள்ள சொத்துக்களை நீதிமன்றம் செல்லாமல் இழந்தார். பல ஏக்கர் மரங்களில் கள் இறக்குவதை நிறுத்தி அவற்றை வெட்டிச்சாய்த்தார். ஊர் ஊராகச் சென்று கதர் விற்றார். காங்கிரஸ் நிதியுதவியோடு நடந்த சேரன்மாதேவி குருகுலத்தில் சமபோஜனம் மறுக்கப்பட்டது. காங்கிரசில் வகுப்புவாரி பிரதிநிதித்துவத் தீர்மானம் தோற்கடிக்கப்பட்டது எல்லாமும் அவரைக் காங்கிரசை விட்டு வெளியேற்றியது.

சுயமரியாதை இயக்கம் துவங்கினார். மக்களை விட்டு வெகுதூரம் நகர்ந்திருந்த ஜஸ்டிஸ் கட்சியை அண்ணாவுடன் இணைந்து கைப்பற்றிச் சீர்திருத்தினார். திராவிடர் கழகமாக அக்கட்சி உருவெடுத்தது. முதல்வராக எத்தனையோ அழைப்புகள் வந்த பொழுதும் ஏற்க மறுத்து தேர்தல் அரசியலை விட்டு விலகியே நின்றார்.

பெண் விடுதலையைத் தீவிரமாக முன்னெடுத்தார். பெண்களைக் காந்திய இயக்கத்தின் மூலம் முதலில் அரசியலுக்குள் கொண்டு வருவதில் ஆரம்பித்த அவர் அதற்குப்பின்னர் திராவிட இயக்கத்திலும் அதைத் தொடர்ந்தார். காந்தி மக்கள் தொகை ஏறுவதைத் தடுக்கப் பிரம்மச்சரியம் கடைபிடிக்கச் சொன்ன பொழுது பெண்கள் குடும்பக் கட்டுப்பாடு செய்துகொள்ள வேண்டும் என்றும், கர்ப்பப்பையை எடுத்துவிடவேண்டும் என்று இவர் முழக்கமிட்டார்.

இளையவராக இருந்தாலும் வாங்க, போங்க என்றே அழைப்பார். நேருக்கு நேராக விமர்சிப்பதை வரவேற்றார். பேசிக்கொண்டு இருக்கும்போது வரும் கேள்விகளுக்கு உடனுக்குடன் பதில் சொல்வது அவரின் வழக்கம். மேடையில் பேசிக்கொண்டு இருந்தபோது தொடர்ந்து ஒருவர் வினாக்களைத் தொடுத்துக்கொண்டே இருந்தார். பெரியாரும் பதில் சொல்லிக்கொண்டே வந்தார். இறுதியில் அவரின் பேனா தீர்ந்துபோனது. பெரியார் தன்னுடைய பேனாவை எடுத்து நீட்டினார்.

இட ஒதுக்கீட்டுக்கு தீவிரமான ஆதரவு, சுய மரியாதைத் திருமணங்களை ஊக்குவித்தது, பெயருக்குப் பின்னிருந்த ஜாதிப்பெயர் நீக்கம் என்று மிக முக்கியமான முன்னெடுப்புகளின் தமிழகத்தின் சமூகச் சீர்திருத்தத்தின் தனித்த தலைவராக அவர் திகழ்கிறார்.

எதிர்ப்பு அரசியலை தீவிரமாக முன்னெடுத்தவர். நடிகர்களால் நாட்டுக்கு வரும் பயனை விடத் தீங்கே அதிகம் என்றும், கூத்தாடிகள் என்றும் விமர்சித்தார். ‘யாரைத்தான் எதிர்க்கவில்லை!’ என்று அவரே சொல்கிற அளவுக்குத் தீவிரமாக இயங்கியவர். இந்தி எதிர்ப்பு, குலக்கல்வித்திட்ட எதிர்ப்பு, சாதி எதிர்ப்பு, கடவுள் மறுப்பு, பிரமாணர் களின் ஆதிக்க எதிர்ப்பு என்று நீண்டன அவரின் போராட்டங்கள்.

கடவுள் வாழ்த்துப் பாடினால் எழுந்து நிற்பார். திரு.வி.க அவரைப்பார்க்க வந்தபோது அவருக்கு விபூதி அணிய தானே பாத்திரத்தை நீட்டினார். சில கோயில்களின் அறங்காவலராகச் சிறப்பாகப் பணியாற்றினார். வாழ்நாள் முழுக்க அரசியல் ரீதியாகவும், கருத்தியல் ரீதியாகவும் எதிர்த்த ராஜாஜி இறந்தபோது கண்ணீர்விட்டு அழுது, வாய்க்கரிசி போடக்கேட்ட மாண்பாளர்.

காங்கிரசை விட்டு விலகிய பின்னர்க் காந்தியை ஓயாமல் எதிர்த்த பெரியார், மதவாதியான கோட்சேவால் மதவெறியை எதிர்த்து தொடர்ந்து குரல் கொடுத்த காந்தி இறந்தபோது தீபாவளிக்குப் பதிலாகக் கோட்சே தூக்கிலிடப்பட்ட தினத்தைக் கொண்டாட வேண்டும் என்றதோடு, ‘சுடப்பட்டவர் சுயமரியாதைக்காரர் காந்தியார்’ என்று குறிப்பிட்ட அவர் காந்திஸ்தான் என்று இந்தியாவின் பெயரை மாற்ற வேண்டும்.’ என்றும் எழுதினார்.
பெரியார், புத்துலகின் தீர்க்கதரிசி, தென் கிழக்கு ஆசியாவின் சாக்ரடீஸ், சமூகச் சீர்திருத்த இயக்கத்தின் தந்தை, அறியாமை, மூடநம்பிக்கை, தேவையற்ற சடங்குகள், அடிப்படையற்ற பழக்கங்களின் தீவிரமான எதிரி” என்று யுனெஸ்கோ புகழாரம் சூட்டியபோது அதை ஏற்றுக்கொள்ள வெட்கப்படுவதாகச் சொன்னார்.

தன்னுடைய இறுதிக் காலத்தில் ஹெர்னியாவால் இறங்கிச் சரியும் குடல், வயிற்றில் பைப் போட்டு சிறுநீர் கழிக்க வேண்டிய சூழலிலும் பகுத்தறிவோடும், சுய மரியாதையோடும் தமிழர்கள் திகழ எண்ணற்ற உரைகளை நிகழ்த்திஅறிவு வெளிச்சம் பாய்ச்சினார் அவர்.

பெரியார் இறந்தபோது எந்த அரசுப் பதவியிலும் இல்லாததால் அவருக்கு எப்படி அரசு மரியாதை செய்வது என்று அதிகாரி கேட்டார். முதல்வர் கலைஞர் இப்படிப் பதில் சொன்னார் , “காந்தி அவர்களும் எந்தப் பதவியிலும் இல்லாமல் இருந்தாலும் அவர் தேசப்பிதா என்பதால் மரியாதைகள் செய்யப்பட்டது இல்லையா? தமிழ் நாட்டின் தந்தை பெரியார்!” என்று சொல்லி சகல மரியாதை களோடு அவரின் இறுதி ஊர்வலம் நடைபெற்றது.

புகழ்பெற்ற வரலாற்று ஆசிரியர் ராமச்சந்திர குஹாவின் ‘நவீன இந்தியாவின் சிற்பிகள்’ புத்தகத்தில் இடம் பெறும் இரண்டு தமிழர்களில் பெரியாரும் ஒருவர். இப்படிப் பெரியாரின் பணிகளை அவர் குறிப்பிடுகிறார் , “அறுபத்தி ஏழில் தி.மு.க. தமிழகத்தில் ஆட்சியைக் காங்கிரசிடம் இருந்து கைப்பற்றியது. அதற்குப் பின்னர் அது இன்றுவரை ஆட்சிக்கு வரவே இயலவில்லை. பெரியாரின் கருத்தியல் மற்றும் அமைப்புரீதியிலான தீவிரமான செயல்பாட்டு அடிப்படைகளே இதற்குக் காரணம். நிச்சயமாகப் பெரியார் தன்னுடைய கனவான தமிழர்களுக்குத் தனி நாடு என்பதற்கு இந்திய அரசுக்குள் அதிகச் சுயாட்சி என்பது ஈடாகாது என்றே எண்ணியிருப்பார்”.- புத்தக கண்காட்சிக்கு வரவிருக்கும் நூலில் இருந்து ஒரு கட்டுரை

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s