ஒரு மனிதன், ஒரு வீடு, ஒரு உலகம் -மானுடம் ததும்பும் உலகம்


ஜெயகாந்தனின் ‘ஒரு மனிதன், ஒரு வீடு, ஒரு உலகம்’ எனும் மானுடம் ததும்பும், அன்பு மிகைத்த, வெறுப்புகள் அற்றதொரு உலகினில் வசித்து விட்டு வருகிறேன். நாவலில் வருகிற ஹென்றி அடையாளங்கள் அற்றவன். அல்லது இன்னமும் சரியாகச் சொல்வதென்றால் அடையாளங்களைப் பொருட்படுத்தாதவன். ‘முரண்பாடுகள் இல்லாத, மோதல்கள் இல்லாத, முணுமுணுப்புகள் இல்லாத, சண்டைகள் இல்லாத, குறைகள் இல்லாத, முறையீடுகள் இல்லாத, எதிர்பார்ப்புகள் இல்லாத, ஆக்கிரமிப்புகள் இல்லாத, அதிகாரங்கள் இல்லாத, அன்பு மட்டுமே’ தழைத்த உலகம் அது.

ஹென்றியின் பப்பாவும், அவனும் உரையாடிக்கொள்ளும் கணங்களில் வழியும் பிரியமும், வன்மங்கள் அற்ற நெருக்கமும், அவ்வப்போது இயல்பாகக் கசிந்து பெருக்கெடுக்கும் கண்ணீரும் நம் கரங்களிலும் ஒட்டிக்கொள்கிறது. ‘என் மதம் எவ்வளவு உசத்தினாலும் அதை என் பிள்ளை மேலே திணிக்கக் கூடாது’ என்கிற பப்பா ‘பிரார்த்தனை என்பது வேண்டுவது அல்ல, விரும்புவது’ என்று நெகிழவைக்கிறார். பப்பா என்கிற சபாபதி, ‘யாரும் யாரையும் அடிக்கக் கூடாது. சண்டையே வேண்டாம்.’ என்று வன்முறையற்ற ஒரு புத்துலகை விரும்புகிறார். கடுமையான அடக்குமுறையால், பூவரச மரத்தின் குச்சியால் மட்டுமே பேசும் கொடுமைக்கார தந்தைக்குள் இருக்கும் மெல்லிய மனிதத்தை நாவல் புலப்படுத்துகிற போது பால்யகால அடிகளின் நினைவுகள் எட்டிப்பார்த்தன.

இந்தக் கதையில் வரும் மனிதர்கள் சொத்துக்களை விடத் தர்மத்தை பெரிதென்று நம்புகிறார்கள். தியாகத்தைச் செய்வதில் தங்களுக்குள் போட்டி போடுகிறார்கள். அவர்கள் அறத்தின் உச்சங்களை மானுட கசடுகளிடையே வெகு இயல்பாக அடைகிறார்கள். தனக்குப் பிரியமான வேறொருவரோடு வெளியேறுகிற மனைவியைக் கொல்ல சொல்லும் கவுரவங்களை ஓரங்கட்டி வைத்துவிட்டு மனசாட்சியின் குரலுக்குச் செவிமடுக்கிறார்கள். சமயங்களில் உறவுகளின் உன்னதம் காக்க தீங்கில்லாத பொய்களைச் சொல்கிறார்கள். காயப்பட்டு நிற்கும் முன்பின் தெரியாத மனிதர்களுக்கு மனம் கரைய கண்ணீர் வடிக்கிறார்கள். சொந்த காயங்களைத் தாண்டி துரோகம் இழைத்தவர்கள் மீது நிகழ்த்தப்படும் சாதிக்கொடுமைகளுக்கு எதிராகக் கவலைப்படுகிறார்கள், அவற்றைக் கடந்து நேசிக்கக் கற்றுத்தருகிறார்கள். 

Image may contain: one or more people and text

கதையின் நாயகன் ஹென்றி கிழங்கு வைக்கிற பெண் துவங்கி, சிறுவர்கள் வரை அனைவரையும் சமமாக மதித்துக் கைகூப்பி வணக்கம் செலுத்துகிறான். அழுதும், பயந்தும் படிக்கிற கல்வி என் மகனுக்கு வேண்டாம் என்கிற பப்பாவின் பேரன்பின் நிழலில் மனிதர்களை அவர்களின் குறைகளோடு ஏற்று அன்பு செலுத்துபவனாக வளர்கிறான். தந்தையின் வேர்கள் தேடி செல்கையிலும், சக மனிதர்களின் துயர்களுக்குச் செவிமடுக்கிறான். கொள்கைகள் என்று தனக்கொன்றும் இல்லை என்று மனிதர்களின் மனதிற்கு முக்கியத்துவம் தருகிறான். அவன் கண்களுக்கு மரத்தில் குதித்தோடும் மந்திகளும், மலையின் பேரழகும், குளிக்கிற பெண்ணும் ஒரே அழகியலோடு ரசிப்பதற்கு உரியவர்கள் ஆகிறார்கள். அந்தப் பார்வையில் மனச்சாய்வுகள் இல்லை. சந்தேகங்கள் சுவடின்றி மனிதர்களை நம்புகிறான். மனதை மட்டும் ரம்மியமாகச் செலுத்தியபடி, வாழ்க்கை இழுக்கும் போக்கினால் புகார்கள் இன்றிப் பயணிக்கிறான். புதிய அனுபவங்களைக் கண்டடைகிறான். 

Image result for ஒரு மனிதன் ஒரு வீடு ஒரு உலகம்

ஏறத்தாழ நாற்பது ஆண்டுகளுக்கு முன்னர் எழுதப்பட்ட இந்த நாவலில் தனிமனிதர்களின் விடுதலைக்கு முக்கியத்துவம் தரப்படுகிறது. சமூகத்தின் கட்டுப்பாடுகள், போலித்தனங்கள், அடக்குமுறைகளில் இருந்து விலகி தங்களுக்கான வாழ்க்கையை வாழ முயல்பவர்கள் இயல்பாகக் கண்முன் நடமாடுகிறார்கள். ‘நான் திருமணங்களுக்கோ, ஆண் பெண் உறவுகளுக்கோ எதிரியில்ல…எதற்குமே எதிரியாக இருப்பது சரியல்ல… ஆனால்..ஆனால் எனக்குத் திருமணம் அவசியமில்லை என்று நான் நினைக்கிறேன். நான் திருமணம் செய்து கொள்ளமாட்டேன். எனக்குக் கூழ் மட்டும் போதும். எல்லாரும் கூழே குடிக்க வேண்டும் என்றா சொல்லுகிறேன்? நீங்கள் சொல்கிற மாதிரி இந்தக் கிராமங்களும், இங்கே வாழ்கிற மக்களும் நகர்வாழ்க்கையோடு பேதமற கலந்து போகிற நாள் வரலாம். வரட்டுமே. அதற்கு நானும் ஏன் ஆசைப்பட வேண்டும்?’ என்கிற ஹென்றியின் குரல் எல்லாக் காலத்திலும் விடுதலை நாடும் மனங்களில் ஒலிக்க வேண்டியது. மந்தைத்தனங்கள் தாண்டி மானுடம் நாடுபவர்களை வழிநடத்தக்கூடிய, மனதின் வன்மங்களை, கசடுகளைக் கரைக்கிற அற்புதத்தைப் புரியும் ஆரவாரமற்ற முக்கியமான நாவல் இது.

ஒரு மனிதன் ஒரு வீடு ஒரு உலகம்
ஜெயகாந்தன்
பக்கங்கள் 316
விலை : 325
காலச்சுவடு பதிப்பகம்

Advertisements

ஜெயலலிதா-புனைவில் புலப்படும் அரசியின் வாழ்க்கை!


சமகால அரசியல் கதைகள் பெரும்பாலும் புனைவு வடிவம் பெறுவதில்லை. குறிப்பாகத் தமிழகத்தில் அரசியல் தலைவர்களின் வாழ்க்கை நாவலாக அரிதிலும், அரிதாகவே வந்திருக்கின்றன. சினிமாவுக்குப் போன சித்தாளு எம்ஜிஆரை குறிப்பிடுவது என்பார்கள். வெட்டுப்புலி நாவலில் திராவிட இயக்க அரசியல் இழைந்து நகரும். சமகாலத் தலைவர்கள் குறித்த வாழ்க்கை வரலாறுகள் பெரும்பாலும் புகழ் பரணிகளாகவே அமைகின்றன. ஆங்கிலத்தில் தமிழகத்தைச் சேர்ந்த தலைவர்கள் குறித்த வாழ்க்கை வரலாறுகள் மிகச் சொற்பம். அண்ணா குறித்து ஒரு நூல், மறைமலையடிகள் குறித்து ஒரு நூல் ஆகியவை நினைவுக்கு வருகின்றன. இருவர் படத்தை எக்கச்சக்க நண்பர்கள் சிலிர்ப்போடு புகழ்வதைக் கண்டிருக்கிறேன். ஆங்கிலத்தில் ஜெயலலிதா இறந்த பின்பு வாஸந்தியின் சிறுநூல் வெளிவந்தது. அவருடைய வாழ்நாளில் நீதிமன்ற தடையை அவர் பெற்றிருந்தது நினைவிருக்கலாம்.

இந்தச் சூழலில் ஆங்கிலத்தில் ஜெயலலிதாவின் வாழ்க்கையை அடிப்படையாகக் கொண்டு அனிதா சிவக்குமரன் ‘The Queen’ என்கிற நாவலை எழுதியிருக்கிறார். ஐந்து வருடங்களுக்கு முன்னரே எழுதிய நாவலை தற்போது தான் வெளியிட்டு உள்ளார். நாவல் முழுக்க முழுக்க ஜெயலலிதாவின் வாழ்க்கையின் பிரதி என்றுவிட முடியாது.

Image result for THE QUEEN ANITA SIVAKUMARAN

கலையரசி என்கிற நாயகி தமிழ் வேர்கள் கொண்டவராகக் காட்டப்படுகிறார். அவரின் மேற்படிப்புக் கனவுகள் பொசுங்குகிற கணத்திலும், தாத்தா என்று வாட்ச்மான் நெஞ்சில் சாய்ந்து அழ மருகுகிற அன்புக்கு ஏங்கும் இளம் நடிகையாகப் பதிய வைக்கப்படுகிறார் கலையரசி. ‘பின்க்கியை தவிர எனக்குத் தோழிகள் இல்லை’ என்கிற கலையரசியின் மனக்குரல் ஜெயலலிதாவின் தனிமை மிகுந்த வாழ்க்கையை நினைவூட்டுகிறது.

முழுக்கப் பி.கே.பி என்கிற எம்.ஜி.ஆரை நினைவுபடுத்தும் கதாபாத்திரத்தின் நிழலில் வளர்கிற ஒருவராகக் கலையரசி இல்லை. அவரின் திரைப்படங்களை அவரின் முகத்துக்கு நேராக விமர்சிக்கிறார்.’வசனம் பேசியே வில்லன்களைத் திருத்துறீங்க. அவங்க உடனே திருந்தி உங்க காலில விழறாங்க. ..நீங்க ஒரு சாக்கடை பக்கமா வரீங்க. நீங்க அதில கால் வைக்கக் கூடாதுனு ஒருத்தன் நீட்டுவாக்கில விழறான். என்ன சினிமா இது?’ என்கிற கணத்தில் தனித்த ஆளுமை வெளிப்படுகிறது.

கதை நேர்க்கோட்டில் பயணிக்காமல் முன்பின்னாகப் பயணித்து வாசிப்பு விறுவிறுப்பைக் கூட்டுகிறது. புனைவு என்கிற வெளியின் சுதந்திரத்தோடு ஜெயலலிதாவின் வாழ்க்கையை மாற்றியும் கதைப்போக்கை அமைக்கிறார் அனிதா. ஆகவே, தெரிந்த கதை தானே என்கிற சலிப்போடு நூலை வாசிக்க முடியாது.

விமர்சனங்கள் பெரும்பாலும் இல்லாமல் ரத்தமும், சதையுமாகக் கலையரசியின் வாழ்க்கை கதையாக விரிந்தாலும் தருணங்களில் கூர்மையான வரிகள் கவனிக்க வைக்கின்றன. ‘இந்த ஆடம்பரமான கல்யாணத்தைப் பத்திய இந்தக் கட்டுரையை எடிட்டர் வெளியிட மாட்டார். அவர் ஒன்னும் மோசமான மனுஷனில்லை. ஆனா, அவர் அலுவலகத்தைக் கட்சி குண்டர்கள் உடைக்கிறதை விரும்ப மாட்டார். அவமதிப்பு வழக்குல உள்ள போய் மிதிபட அவர் தயாரில்லை. அவர் மனைவி முகத்தில் ஆசிட் அடிக்கிறதை அவர் எப்படித் தாங்க முடியும்?’

ஆண்களால் மட்டுமே சூழப்பட்ட அரசியலில் தனக்கு என்று ஒரு இரும்பு கூண்டை கட்டிக்கொண்ட கலையரசியின் வாழ்க்கைக்குள் வீடியோ கடை நடத்தும் செல்வி நுழைந்த பின்பு எப்படி ஊழல்மயமாகி போகிறது வாழ்க்கை என்பது எளிய, விறுவிறுப்பான நடையில் புலப்படுத்தப்படுகிறது. உதாரணத்துக்கு ஒன்று, ‘அதிகாரப்பூர்வமாக அவரின் சம்பளம் ஒரு ரூபாய் ..ஆனால், அவரால் எதையும் தனதாக்கி கொள்ள முடியும். விரலைக் கூடத் தூக்க வேண்டியதில்லை. பண மழை பொழிந்தது. ஒரு நோயுற்ற மனிதன் பல்வேறு நோய்களைச் சேர்ப்பது போல அதிகாரத்தில் இருந்தபடி அவர் சொத்துக்களைக் குவித்தார்.’

எனினும், இறுதியில் கலையரசி கைது செய்யப்பட்ட பின்பு வரும் விவரிப்பில்
கலையரசி மீது அனுதாபம் ஏற்படுகிற தொனியிலேயே ஆசிரியரின் நடை அமைகிறது. கருணாநிதியின் அரசியல் ஓரிரு கணங்களில் கூர்மையாக விமர்சிக்கப்படுகிறது. தொலைக்காட்சிகளின் மூலம் நடத்தப்படும் அரசியல், சூப்பர் ஸ்டாரின் வாய்ஸ் படலம் ஆகியவையும் உண்டு.

படிப்படியாக அரசியலின் ஆழ அகலங்கள் புரிந்து கொள்ளும் கலையரசி எப்படி அரசி ஆகிறார் என்பதைச் சில கணங்களில் இயல்பாக நாவல் புரிய வைக்கிறது. குறிப்பாக மேடைப்பேச்சில் எப்படித் தனக்கான பாணியைக் கண்டடைகிறார் என்பது கண்டிப்பாக வாசிக்க வேண்டிய பகுதி. சர்வாதிகாரியாக உருமாறும் கலையரசியின் வாழ்க்கை பக்கங்கள் 2005-யோடு முடிந்துவிடுவது வாசகருக்கு சற்று ஏமாற்றத்தை தரலாம்.

நாவலின் பெரிய பலவீனம் கோட்பாட்டுத் தளத்தில் பயணிக்க மறப்பது. ஏன் பல்லாயிரம் பேர் கடவுளாக வழிபடுகிறார்கள் என்பதை இன்னமும் செறிவாக நம்ப வைக்காமல் கடப்பது. ஜெயலலிதாவின் வாழ்க்கையின் பிரதி அல்ல இந்த நாவல். அதன் தாக்கம் வெவ்வேறு இடங்களில் உண்டு. எல்லாவற்றுக்கும் மேலாகக் கலையரசியின் ஆழ்மனப்போராட்டங்கள் இன்னமும் நெருக்கமாகப் பதியப்பட்டு இருக்கலாம். எனினும், முக்கியமான முயற்சி.

Image result for THE QUEEN ANITA SIVAKUMARAN

The Queen
Anita SIvakumaran
Juggernaut Books
பக்கங்கள்: 280
விலை: 350

கர்ணனின் கவசம் நாவல் அறிமுகம்


கர்ணனின் கவசம் நாவலை ஒரு இரண்டரை மணிநேரத்தில் படித்து ஒரு இனம் புரியாத உணர்வோடு தான் இந்தப்பதிவை அடிக்கிறேன். நான் புனைவை அவ்வளவாக இப்பொழுதெல்லாம் வாசிப்பதில்லை ; என்னுடைய முதல் பத்தாண்டு வாசிப்பு பெரும்பாலும் புனைவிலேயே கழிந்தது. நிறைய சாகச நாவல்களை படித்தவன் என்கிற முறையில் கொஞ்சம் கர்வத்தோடு தான் இந்த நாவலை எடுத்தேன். 

ஆனால்,ஆசிரியர் பிரமிக்க வைத்திருக்கிறார் என்றால் அது மிகையில்லை. இப்படித்தான் கதையில் திருப்பம் வரும் என்று யூகிக்கவே முடியாத வகையில் சரசரவென்று ட்விஸ்ட்களை தெறிக்க விடுகிறார் ஒருபுறம் என்றால் யார் எப்பொழுது வில்லனாக மாறுவார்,யார் உருவத்தில் யார் இருப்பார் என்று யோசித்தே பல புள்ளிகளில் அசந்து போனேன். பொன்னியின் செல்வன்,மகாபாரதம் அப்புறம் ஹாலிவுட் சினிமா தாக்கத்தில் எழுந்த சூப்பர் வில்லன்கள் என்று கதாப்பாத்திரங்கள் கதையில் விறுவிறுப்பை கூட்டிக்கொண்ட போகிறார்கள்.

கர்ணனின் கவசம் எங்கிருக்கிறது,அதை அடைய வந்திருக்கும் ஜெர்மானிய,சீன உளவாளிகள் என்ன செய்வார்கள் ? திசை மாறியிருக்கும் சிலைகள் காட்டும் வழியெங்கே போய் முடியும் என்றெல்லாம் எதற்கும் நகங்கடித்து கவலைப்பட முடியாது ! அதற்குள் அடுத்த மாற்றம் நடந்து முடிந்திருக்கும். பிரதிபிம்பம் தான் உலகம் என்பதை வைத்துகொண்டு சிவராமன் சார் பின்னியிருக்கும் கதைச்சரடு சொல்லிப்புரியப்போவதில்லை.

வில்லன் தோற்கப்போகிறோம் என்கிற கவலையே இல்லாமல் இறுதி வரை முயல்வதும் இன்னொரு பக்கம் ஆயியின் கம்பீரம் என்னவோ செய்கிறது. விமலானந்தர் தருகிற இறுதிகட்ட அதிர்ச்சி கூடவே ராஜி,ஆயி யார் என்கிற விவரிப்புகள் முதல் அத்தியாய வரிகள் மீண்டும் வந்து ஹலோ சொல்வது என்று நவீன இலக்கிய பாணியில் கதையை நகர்த்திப்போகும் ஆசிரியர் விறுவிறுப்பாக வாசகன் வாசிக்க வேண்டும் என்பதற்காக மெனக்கெட்டு இருக்கிறார். 

என்னை இந்த புத்தகம் ஏமாற்றவில்லை. சில சமயங்களில் அந்த ஸ்லோகத்தை நானும் தாராவுடன் சேர்ந்து சொன்னேன் . Ramesh Vaidya அண்ணனின் மின்னியைக்கொன்று விடுவில் இப்படி கடைசியாக மந்திரம் உச்சரித்தாக ஞாபகம். குழந்தை தான் நீ என்று இந்த நாவலின் சாகச நடை சொல்லிவிட்டது. திருப்பி இந்த கதையை அப்படியே கோர்வையாக சொல்லமுடியாது என்பதில் இருக்கிறது இதன் வெற்றி ! இதையே நீங்கள் தோல்வியாகவும் பார்க்கலாம்-சில நண்பர்கள் அப்படி சொன்னார்கள் 

கதையின் இறுதி அத்தியாயம் திருப்தியான முடிவைத்தரவில்லை என்று சில நண்பர்கள் சொல்லியிருந்தார்கள். அது அப்படித்தான் இருக்க வேண்டும் என்று எனக்கு படித்து முடித்தபின் தோன்றியது. தம்பி அனிமேசன் துறையில் கலக்கிக்கொண்டு இருப்பவன் ; கேமிங்கிலும் புலி ,”அண்ணா நம்ம நாட்டோட மித்தாலிஜியை வைச்சு கேமிங் க்ரியேட் பண்ண நல்ல கதையிருக்கா ?” என்று கேட்டான் நாவலை வாசிக்க ஆரம்பித்த நூறாவது பக்கத்தில் ,”இதுதான் அந்த நாவல் தம்பி !” என்று அவனுக்கு அழைத்து சொன்னேன்.  வாழ்த்துகள் அண்ணா !

வெட்டுப்புலி-நூல் அறிமுகம்


தமிழ்மகன் அவர்களின் வெட்டுப்புலி நாவல் படித்துவிட்டு அது தந்த தாக்கம் அகலாமலே இந்த பதிவை பதிகிறேன். ஒரு எழுபத்தைந்து ஆண்டுகால சினிமா,திராவிட இயக்கத்தின் தாக்கம்,வெட்டுப்புலி எனும் சிறுத்தையை கொன்ற கொள்ளுத்தாத்தாவின் படம் தாங்கிய தீப்பெட்டியின் மாற்றம் தேடி போகும் பேரன் ஆகியவற்றைக்கொண்டு எந்த திணிப்பையும் மேற்கொள்ளாமல் மனதுக்கு மிகநெருக்கமான ஒரு நாவலை உருவாக்கி இருக்கிறார் ஆசிரியர். 

எதையும் திருடிக்கொண்டு வந்துவிடும் படவேட்டான்,சாதி மாறி திருமணம் செய்துகொள்ள ஆசைப்பட்டு அதை சாதிக்க இருக்கும் மன மற்றும் சமூகத்தடைகளை உணரும் லட்சுமணன்,பெரியாருக்கும்,காமராஜருக்கும் இருந்த நெருங்கிய பந்தத்தை மூன்று பார்வையில் காட்டும் நுணுக்கம்,திராவிட இயக்கத்தில் கணவனும்,அதிமுகவில் மனைவியும் இணைந்து இறுதியில் அன்னையின் பக்தர்களாக இருவரும் மாறிநிற்கும் வேடிக்கை என்று பல ரசமான பின்னல்கள். 

“எம்.ஜி.ஆர் ஒழுங்கா செய்ஞ்ச ஒரே விஷயம் பெரியாரோட எழுத்து சீர்திருத்தத்தை அமல்படுத்தினது தானே ?”
“பெரியார் ரொம்ப பிரக்ரசிவ் ! அவர் சொன்னதுக்கு ஈடா வேற யாரும் சிந்திச்சது இல்லை ? எங்களை எதிர்த்த அவர் இன்னைக்கு இருந்திருந்தா நீங்க பண்ணுற வேலைகளை பார்த்து உங்களைத்தான் முழுமூச்சா எதிர்த்திருப்பார் ! உண்மையில் பெரியார் இந்து மதத்துக்குள் இருந்து தானே எதிர்த்தார். அவர் மற்ற மதங்களை எதிர்க்கலையே ? இந்த மதத்தை மாற்ற வந்த முனிவர் அவர் ” என்று பிராமணர்களின் பார்வையாக பதிவு செய்யப்படும் வரிகள் எல்லாமே கைதட்டல் போடவைக்கும் ராகம் 

வண்ணத்திரை இதழில் இடைப்பக்கத்தை வளமான படங்களால் நிறைக்கும் திராவிட இயக்க வாரிசு என்று நகரும் நாவலில் சினிமாவின் போக்கும் அது ஏற்படுத்திய தாக்கமும் கூடவே கடத்தப்படுகிறது. தியாகராஜ பாகவதர்,லக்ஷ்மி காந்தன் கொலை வழக்கு,எம்.ஆர்.ராதா எம்.ஜி.ஆரை சுட்ட வழக்கு,பாலச்சந்தர்,ரஜினி,கமல் ஆகியோர் மேற்கொண்ட ப்ரவேசம்,ஈழத்தமிழர் போராட்டம் எல்லாமும் உண்டு. ஆனால்,எதுவுமே தனித்து தெரியாது. கதைப்போக்கில் வெகு இயல்பாக அவை உங்களை பயணம் கூட்டிப்போகும் 

திராவிட இயக்கத்திலேயே ஊறிப்போனவர்களுக்கு இது ஒரு நினைவுக்குறிப்பை போலவே தோன்றும். தமிழகத்தின் சமூக மாற்ற வரலாற்றை அறியாதவர்கள் இந்த நாவலை படித்தால் அது தரும் தூண்டுகோலில் இன்னமும் தீவிர வாசிப்புக்கு போவார்கள். “ஒருத்தன் பக்கத்தில் வெட்டுப்பட்டு செத்துக்கிடக்க நிம்மதியா எப்படி தான் தூங்கறீங்களோ?” என்று கேட்கிற நாவலின் இறுதிவரிகள் திராவிட இயக்கத்தின் அடிப்படைகள் அரசியல் நுழைவில் காலப்போக்கில் கைகழுவப்பட்டதை நினைவுபடுத்தியபடியே நாவலை முடிக்க வைக்கிறது
உயிர்மை வெளியீடு 
ஆசிரியர் : தமிழ்மகன்
370 பக்கங்கள் 
ரூபாய்.240